०२ असार २०८३ बनेपा, काभ्रे
ज्ञानकुञ्ज शैक्षिक प्रतिष्ठानले कक्षा ११ मा भर्ना भएका नवआगन्तुक विद्यार्थीहरूका लागि आयोजना गरेको अभिमुखीकरण कार्यक्रम भव्य रूपमा सम्पन्न गरेको छ । प्रतिष्ठानका अध्यक्ष सुरकृष्ण वैद्यको सभापतित्वमा सम्पन्न कार्यक्रममा विद्यार्थी, अभिभावक, शिक्षक, पत्रकार तथा प्रशासनिक कर्मचारीहरूको उल्लेखनीय सहभागिता रहेको थियो ।
कार्यक्रमको उद्धघाटन सत्रमा प्रतिष्ठानका सहायक कलेज प्रमुख नवराज चौलागाईंले नवआगन्तुक विद्यार्थीहरूलाई स्वागत गर्दै व्यावसायिक तथा व्यावहारिक शिक्षाको महत्वमाथि प्रकाश पार्दै वर्तमान प्रतिस्पर्धी युगमा आत्मनिर्भर र दक्ष जनशक्ति उत्पादन गर्न आवश्यक मार्गदर्शन र अवसर प्रदान गर्ने प्रतिबद्धता व्यक्त गरे। उनले ज्ञानकुञ्जले केवल पाठ्यपुस्तकमा सीमित नभई विद्यार्थीहरूको समग्र व्यक्तित्व विकासलाई प्राथमिकतामा राखेको बताए । उनले विद्यार्थीहरूलाई आफ्नो क्षमता र सम्भावनाको अधिकतम उपयोग गर्दै जिम्मेवार, नैतिक तथा सक्षम नागरिक बन्न प्रेरित गरे ।
त्यसैगरी, सहायक प्रिन्सिपल नमराज दाहालले नैतिक शिक्षाको अपरिहार्यतामाथि जोड दिँदै वर्तमान शिक्षा प्रणालीमा मूल्य र मान्यताहरूको संरक्षण आवश्यक रहेको धारणा व्यक्त गरे । उनले ज्ञानकुञ्जले विद्यार्थीहरूमा नैतिकता, सामाजिक उत्तरदायित्व तथा सकारात्मक सोचको विकासका लागि विशेष पहल गर्दै आएको बताए । कार्यक्रममा कलाकर्मी भूषण भोमी श्रेष्ठ, कलाकर्मी तथा संचारकर्मी सचित खड्का र अन्तराष्ट्रिय भलिबल रेफ्रि विजय के.सी.लाई सम्मान गरिएको थियो ।
कार्यक्रमको विशेष आकर्षणका रूपमा हास्य कलाकार जितु नेपाल को प्रस्तुति रहेको थियो। उनले हास्यव्यङ्ग्यमार्फत शिक्षा, जीवनशैली तथा सामाजिक मूल्यसँग सम्बन्धित सन्देश प्रस्तुत गरेका थिए । सहभागी विद्यार्थी तथा अभिभावकहरूले उक्त प्रस्तुति मनोरञ्जनात्मकसँगै सन्देशमूलक रहेको प्रतिक्रिया दिएका थिए ।
समापन समारोहलाई सम्बोधन गर्दै अध्यक्ष सुरकृष्ण वैद्यले शिक्षा प्रणालीलाई केवल परीक्षा र प्रमाणपत्रमा सीमित नराखी विद्यार्थीहरूको सृजनशीलता, नेतृत्व क्षमता तथा जीवनोपयोगी सीप विकासमा केन्द्रित गरिनुपर्ने धारणा व्यक्त गरे। उनले ज्ञानकुञ्जलाई विद्यार्थीहरूको बहुआयामिक विकासका लागि उपयुक्त शैक्षिक मञ्चका रूपमा स्थापित गर्ने प्रतिबद्धता दोहोर्याए ।
कार्यक्रममा विभिन्न सांगीतिक तथा सांस्कृतिक प्रस्तुति समेत समावेश गरिएको थियो, जसले सहभागी विद्यार्थीहरूमा उत्साह, आत्मविश्वास र सकारात्मक ऊर्जा थपेको आयोजकले जनाएको छ । प्रतिष्ठानका अनुसार अभिमुखीकरण कार्यक्रमको मुख्य उद्देश्य नवआगन्तुक विद्यार्थीहरूलाई शैक्षिक वातावरण, संस्थागत कार्यशैली, नीति तथा मूल्य–मान्यतासँग परिचित गराउनु रहेको थियो । कार्यक्रममार्फत विद्यार्थीहरूमा अध्ययनप्रति थप जागरुकता र संस्थाप्रति विश्वास अभिवृद्धि भएको विश्वास प्रतिष्ठानले व्यक्त गरेको छ ।
साथै प्रतिष्ठानले आगामी दिनमा पनि विद्यार्थीको सर्वाङ्गीण विकासलाई केन्द्रमा राखी यस्ता प्रभावकारी तथा प्रेरणामूलक कार्यक्रमहरूलाई निरन्तरता दिने जनाएको छ ।
