काठमाडौं,
चैत २८ ।

विन्ध्यवासिनी म्युजिक अवार्ड २०८२ मा संगीतरत्न शम्भूजित बासकोटालाई लाइफटाइम अचिभमेन्ट अवार्ड प्रदान गरिएको छ । बासकोटालाई एक लाख एक रुपैयाँ नगदसहित सम्मानपत्र, ट्रफी, दोसल्ला र मालाद्वारा लाइफटाइभ अचिभमेन्ट अवार्ड प्रदान गरिएको हो ।

शुक्रबार सम्पन्न १६औं विन्ध्यवासिनी म्युजिक अवार्डको अवसरमा लोकप्रिय गायक शिव परियार र लोकप्रिय गायिका समीक्षा अधिकारी सर्वोत्कृष्ट आधुनिक गायक गायिका घोषित हुनुभयो ।

गायक परियारले ‘परेली’ गीतबाट अवार्ड चुम्नुभएको हो भने गायिका अधिकारीले ‘के हेरेको टुलुटुलु’ गीतबाट अवार्ड चुम्न सफल हुनुभएको हो । उहाँहरूलाई नगद पाँच हजार रुपैयाँसहित ट्रफी प्रदान गरिएको थियो ।

विभिन्न ११ विधामा आयोजना भएको १६ औं विन्ध्यवासिनी अवार्डमा कला पत्रकारिता सम्मानबाट पत्रकार पवन आचार्यलाई २५ हजार नगदसहित सम्मान अर्पण गरियो । त्यस्तै, प्रेमध्वज संगीतरत्न सम्मानबाट नगद २५ हजारसहित गायिका रचना रिमाललाई सम्मान अर्पण गरिएको थियो ।

त्यसैगरी गीतकार विजय शिवाकोटीलाई नगद ५० हजार राशिसहित विन्ध्यवासिनी संगीत साधना सम्मान अर्पण गरिएको थियो । त्यस्तै, लोकप्रिय गायक पशुपति शर्मालाई नगद २५ हजारसहित झलकमान लोक संगीत सम्मान अर्पण गरिएको थियो ।

१६औं विन्ध्यवासिनी म्युजिक अवार्डमा सर्वोत्कृष्ट लोकदोहोरी गायिका ज्योति मगरले चुम्न सफल हुनुभयो भने सर्वोत्कृष्ट लोकदोहोरी गायक अर्जुन सापकोटाले चुम्न सफल हुनुभयो । गायिका मगरले ‘झ्याप्पै’ गीतबाट अवार्ड चुम्न सफल हुनुभएको हो भने गायक सापकोटाले झलिको गीतबाट अवार्ड चुम्न सफल हुनुभएको हो ।

कार्यक्रमलाई स्वागत गर्दै अवार्डकी अध्यक्ष लीना शर्मा रेग्मीले स्रष्टा कलाकारहरूको सम्मानमा विन्ध्यवासिनी अवार्ड सदैव क्रियाशील र कर्तव्यबोधका साथ लागिपरेको बताउनुभएको थियो । उहाँले सम्मान र अवार्डको कार्यक्रमलाई परिमार्जित गर्दै लगेको बताउँदै विगतका वर्षमा भइरहेको अवार्डभन्दा विधाहरू कटौती गरी ११ विधामा अवार्ड प्रदान गरिएको जानकारी गराउनुभयो ।

कार्यक्रममा समीक्षा अधिकारी, सुमन कुमार श्रेष्ठ, अजर जंगम, पशुपति शर्मा, रचना रिमालले गीत प्रस्तुत गर्नुभएको थियो भने गुरुआमा फिल्मस्को तर्फबाट गीता ढुंगाना, बबिन सिंह ठकुरी, कविता न्यौपाने, एलिना रायमाझीले नृत्य प्रस्तुत गर्नुभएको थियो ।

सर्वोत्कृष्ट शब्द रचनाको अवार्ड भूपेन्द्र बुढाथोकीले चुम्न सफल हुनुभयो । गीतकार बुढाथोकीले सर्वाधिक भोटिङबाट प्राप्त गर्ने पब्लिक च्वाइस अवार्डसमेत चुम्दै दुई विधामा अवार्ड प्राप्त गर्नुभएको थियो । सर्वोत्कृष्ट संगीत रचनाको अवार्ड भने ‘मिर्मिरेमा बासेको भाले’ गीतबाट शिव हमालले चुम्न सफल हुनुभयो ।

त्यस्तै ‘बैंशले जुरुक्क पार्‍यो’ गीतबाट दीपक विष्टले सर्वोत्कृष्ट भिडियो सम्पादनको अवार्ड प्राप्त गर्नुभयो भने बुद्ध थापाले ‘ए आमा जाम भन्यो मलाई’ गीतबाट सर्वोत्कृष्ट छायाँकारको अवार्ड चुम्न सफल हुनुभयो ।

सर्वोत्कृष्ट म्युजिक भिडियो मोडलको अवार्ड गीता ढुंगाना र प्रभातपाल ठकुरीले ‘कता हिन्यौ साइला’ गीतबाट चुम्न सफल हुनुभयो । त्यस्तै, रितु बोहराले ‘पैसा जोगाउन’ गीतबाट सर्वोत्कृष्ट नवगायनको अवार्ड चुम्न सफल हुनुभएको थियो ।