जेठ ११ ।
साफ महिला च्याम्पियनसिप २०२६ अन्तर्गत नेपालले आज उद्घाटन खेलमा भुटानसँग प्रतिस्पर्धा गर्दै प्रतियोगिताको सुरुआत गर्दैछ । खेल भारतको गोवा राज्यस्थित मडगाउँ शहरको जवाहरलाल नेहरु रंगशाला मा नेपाली समयअनुसार दिउँसो ४ः४५ बजे सुरु हुनेछ ।
आठौं संस्करणसम्म आइपुग्दा नेपालले ६ पटक उपविजेतामै सीमित रहँदै आएको छ । लगातार फाइनल पुगेर पनि उपाधि जित्न नसकेको पीडालाई यसपटक अन्त्य गर्ने लक्ष्यसहित नेपाली महिला टोली भारत पुगेको हो ।
नेपाली टोलीका मुख्य प्रशिक्षक नवीन न्यौपाने ले यसपटक प्रतियोगितालाई केवल क्षेत्रीय प्रतिस्पर्धा नभई नेपाली महिला फुटबलको प्रतिष्ठा र पहिचानसँग जोडिएको अभियानका रूपमा लिएका छन् । अनुभवी र युवा खेलाडीको सन्तुलित संयोजनसहित मैदान उत्रने तयारीमा रहेको टोलीले उपाधि जित्ने स्पष्ट लक्ष्य राखेको छ ।
टोलीमा अनिता बस्नेत, हिरा भुजेल र गीता राना जस्ता अनुभवी खेलाडीको उपस्थिति रहेको छ । उहाँहरूले टोलीको मनोबल बलियो बनाउने अपेक्षा गरिएको छ । साथै युवा खेलाडीका लागि पनि साफ च्याम्पियनसिप आफूलाई प्रमाणित गर्ने महत्त्वपूर्ण अवसरका रूपमा हेरिएको छ ।
यद्यपि नेपाली टोलीलाई यसपटक दुई महत्त्वपूर्ण खेलाडीको अनुपस्थितिले असर पार्ने देखिएको छ । टोलीकी स्टार फरवार्ड सावित्रा भण्डारी ‘साम्बा’ तथा अनुभवी खेलाडी सविता राना चोटका कारण प्रतियोगिताबाट बाहिर हुनुहुन्छ । उहाँहरूको अनुपस्थितिले आक्रमण र अनुभव दुवै पक्षमा चुनौती थपिएको छ ।
छ टोली सहभागी प्रतियोगितामा नेपाल समूह ‘ए’ मा रहेको छ । यस समूहमा भुटान र श्रीलंका छन् । नेपालले दोस्रो खेल जेठ १७ गते श्रीलंकासँग खेल्ने तालिका छ ।
समूह ‘बी’ मा साविक विजेता बंगलादेश, आयोजक भारत र माल्दिभ्स छन् । यस समूहका टोली बलिया मानिएकाले सेमिफाइनल चरणमा नेपालले कडा प्रतिस्पर्धा सामना गर्नुपर्ने सम्भावना देखिएको छ । प्रतियोगिताको सेमिफाइनल जेठ २० गते तथा फाइनल जेठ २३ गते हुनेछ ।
